Afârs europeans

Il Consei regjonâl al è esercite lis sôs funzions, ancje su la fonde dal propri regolament interni, partecipant in maniere ative sedi ae fase assendente di formazion des politichis e dai ats de Union europeane, sedi ae fase dissendente di recepiment de normative comune sul plan interni.

E je une vore impuartante la Session europeane, cuant che il Consei regjonâl al è clamât dongje par esaminâ il program di lavôr anuâl de Comission europeane. Dopo des audizions tematichis dai puartadôrs di interès dal teritori, la Session si siere cuntune Risoluzion de Assemblee che, cjapant sù i contribûts dai stakeholders, e individue i progjets di ats de UE di plui grant interès pal Friûl – Vignesie Julie formulant osservazions, e ancje i indreçaments destinâts ae Zonte regjonâl pe partecipazion ae formazion des politichis europeanis.

Di là de prerogative peade ai procès normatîfs de UE, il Consei regjonâl al à un rûl atîf, tant che istituzion o midiant dai siei components, ancje dentri dai ents e des istituzions europeanis de UE e no dome. Tra chestis, il Comitât European des Regjons, la CALRE, la rêt RegHub e altris iniziativis.

Il Comitât european des regjons (CdR) al è un orghin consultîf de UE, e i siei membris a àn di jessi titulârs di un mandât eletorâl inte suaze di une coletivitât regjonâl o locâl di un dai 27 Stâts de Union, o a scuegnin jessi responsabii in sens politic denant di une Assemblee elete. Il Consei regjonâl al partecipe al Comitât midiant dal so President, che al fâs part de delegazion taliane e che a vuê al è Vicepresident de Comission CIVEX.

Midiant dal CdR, regjons e ents locâi a àn la pussibilitât di esprimi la lôr opinion tal procès legjislatîf de UE, cun chê di infuartî la lôr influence in Europe e sigurâ che la posizion e lis dibisugnis dai ents teritoriâi a sedin rispietadis.

La Comission europeane e consulte il CdR za des primis fasis dal procès legjislatîf european pes politichis che a tocjin in maniere direte i ents locâi e regjonâi. Il CdR al pues dut câs fâ azions di iniziative proprie, adotant une posizion suntun teme specific sot forme di “parê”.

La Conference des Assembleis Legjislativis des Regjons de Europe, CALRE, e je une associazion che e met adun i Parlaments regjonâi di 72 regjons de UE, rapresentâts in cheste sede dai lôr Presidents. Ancje il Consei regjonâl dal Friûl – Vignesie Julie al è membri.

Ancje se no je previodude di tratâts, la mission de CALRE za de sô fondazion, intal 1997, e je chê di aprofondî i principis democratics e di partecipazion intal ambit dal ordenament comun. Obietîfs principâi de associazion a son fâ rispietâ e consolidâ il principi di sussidiarietât inte UE e rinfuarçâ lis relazions tra lis Assembleis Legjislativis Regjonâls, ancje midiant dal scambi di buinis pratichis.

La adesion ae CALRE e je limitade aes Regjons cun Parlaments dotâts di podês legjislatîfs (par esempli, i Länder todescs e austriacs, i Parlaments des Comunitâts autonomis de Spagne, i Conseis regjonâi talians). Ancje se i podês des Regjons e il grât di autonomie che ur è ricognossût a puedin cambiâ une vore intai Paîs europeans, si trate in ducj chescj câs di Assembleis che a fasin part de Union Europeane e che a àn podês legjislatîfs. Chestis carateristichis i dan ae CALRE une omogjeneitât sostanziâl, che e je funzionâl ae individuazion di obietîfs comuns. Cun di plui, stant che a àn podês legjislatîfs, dutis chestis Regjons a recepissin inte lôr normative lis regulis europeanis.