Il Consei regjonâl dal Friûl – Vignesie Julie

Il Consei regjonâl al è l'orghin di rapresentance de comunitât regjonâl.

Al esercite la funzion legjislative che e je atribuide ae Regjon dal Statût speciâl di autonomie, al partecipe ae determinazion des liniis politichis regjonâls e al espliche lis funzions di control su la ativitât de Zonte, e ancje ogni altre funzion che i conferissin lis normis costituzionâls, chês statutariis e lis leçs dal Stât e de Regjon; al esercite ancje la funzion di control sul la metude in vore des leçs e di valutazion dai efiets des politichis regjonâls.

Al fâs bon, cu la leç di belanç di prevision, l'assestament e il cont consuntîf de Regjon. Al pues fâ propuestis di leç al Parlament.

Il Consei regjonâl al è elet cun vôt universâl diret, avuâl e segret; a vuê il Consei al è formât di 49 Conseîrs regjonâi, che a rapresentin dute la Regjon cence vincul di mandât e che no puedin jessi clamâts a rispuindi pes opinions esprimudis e pai vôts dâts tal esercizi des lôr funzions.

Il Conseîr al à dirit di iniziative pes leçs regjonâls e par chês altris deliberazions dal Consei, e al à dirit di interogazion, interpelance e mozion.

 

Il Statût speciâl e lis normis di atuazion statutarie

Il Statût Speciâl de Regjon autonome Friûl-Vignesie Julie al è stât adotât cun leç costituzionâl dai 31 di Zenâr dal 1963, n. 1 e modificazions e integrazions seguitivis, e al è la cjarte fondamentâl de Regjon; al fisse i principis, lis competencis legjislativis e aministrativis, lis normis fondamentâls di organizazion e ancje i rapuarts cui Ents locâi e cul Stât.

Lis normis di atuazion statutarie a son lis disposizions legjislativis statâls che a metin in vore e che a integrin l’ordenament de Regjon.

 

Il regolament interni

La ativitât consiliâr e je dissiplinade dal Regolament interni, fat bon dal Consei a maiorance assolude dai siei membris.

Il Regolament al à l’obietîf di garantî che la ativitât consiliâr (legjislative, di control, e v.i.) si davuelzi in maniere ordenade e spedide, e ancje chel di tutelâ la diversitât di opinions dai singui e dai grups di oposizion, sigurantjur la pussibilitât - in Aule e intes Comissions - di influî in ogni fase dal dibatiment.