La Sede

Il Consei regjonâl si è dât dongje pe prime volte ai 26 di Mai dal 1964. Par vot agns, lis voris dal Consei a son stadis ospitadis te sale dal consei dal municipi di Triest, intant che i uficis e i servizis a jerin logâts tal palaç Modello in place Unitât di Italie. No cjatant un edifici adat intal cuartîr dal borc taresian e scugnint rispuindi aes dibisugnis di acessibilitât e di rapresentance, la Regjon e cjatà in place Oberdan – li che prime al jere il Centri Internazionâl di Fisiche Teoriche de AIEA - la sede plui juste pal so orghin legjislatîf.

I lavôrs di restaur e adatament a jerin stâts assegnâts al architet Nordio che in cheste maniere al podè tornâ a cjapâ in man il so vecjo progjet. Al veve volût cun se l'architet Aldo Cervi, che al veve firmade la sede RAI. Plui tart, lis cundizions di salût malsiguris di ducj i doi i professioniscj triestins a àn obleât a domandâ l’intervent di doi architets venezians, Giorgio Bellavitis e Nani Valle, che i àn dât ae opare une olme personâl evidente, risultât di esperiencis une vore diferentis tra di lôr par etât e formazion.

La aule dal Consei regjonâl, che si cjate al prin plan in posizion baricentriche, e je calcolade di simpri il cuarp li che si coleghin i uficis interessâts al funzionament des voris de Assemblee. E à une superficie di 400 metris cuadrâts cirche e e da acet a 74 sentis. La galarie, invezit, e je spartide in trê setôrs, risiervâts aes autoritâts, al public e ai gjornaliscj.

Un spazi di pertinence dal emicicli, clamât sale dai “pas pierdûts”, e da acet ai Conseîrs intes polsis dai lavôrs de Assemblee e met in colegament la aule cui uficis di rapresentance e cu lis salis des Comissions legjislativis. La sale dai “pas pierdûts” si dopre dispès par ospitâ mostris pitorichis, esposizions di artesanât e rassegnis fotografichis. Lis salis des Comissions legjislativis a son invezit trê ambients che si cognossin pal colôr dominant des parêts e de mobilie: sale zale, sale verde e sale turchine.

Tai plans disore dal edifici a son altris ambients:  cualchidun al è di rapresentance – lis stanziis dal President dal Consei e dai Conseîrs – e altris doprâts tant che uficis e archivis.

La inaugurazion uficiâl de sede dal Consei regjonâl e je stade fate ai 5 di Otubar dal 1972 dal President de Republiche di chê volte, Giovanni Leone.

Il confenon al rapresente il simbul uficiâl de Regjon, concedût pal Friûl – Vignesie Julie cuntun decret dal President de Republiche tal 1967. Al è fat di un drap turchin ornât di ricams di aur, là che e je la steme de Regjon. La aste verticâl e je involuçade cun vilût dal stes colôr. Ancje tal pontâl e je rapresentade la steme cuntune incision. La steme e figure lis origjins e lis tradizions storichis, politichis, sociâls e culturâls dal Friûl – Vignesie Julie.

Tal 2002, te jentrade principâl dal palaç al è stât inserît un mosaic pavimentâl di Sergio Pasto che, ispirantsi ae innomenade scuele di Spilimberc, al à puartât tal concret un dissen dal pitôr Arrigo Poz.

Cun cheste opare, si à volût descrivi une regjon che, lant fûr dai confins teritoriâi, e cjale bande la Europe - rapresentade des 12 stelis simbul de Union - valorizant tal stes timp lis sôs carateristichis di tiere che e tache dal mâr e, passant la plane e i cuei, e rive fin aes Alps.

La superficie dal mosaic e je di 22 metris cuadrâts.

La jentrade de sede principâl dal Consei regjonâl e je in Place Oberdan, 6 a Triest.
Par acedi ae sede dal Consei al covente un document di identitât valit, di lassâ al personâl incargât che al consegnarà un contrassegn di pueste, di tignî intun puest visibil sul vistiari. Il document al sarà tornât cuant che si jes, dopo vê consegnât il contrassegn.

L'acès aes sedis consiliârs al è dissiplinât di un regolament di pueste.

Sede principâl: si jentre ancje dal acès pai veicui di vie Giustiniano e, lis carocelis di piçulis dimensions, ancje de jentrade principâl di place Oberdan 6.
Sede di place Oberdan 5: si jentre ancje dal acès pai veicui di vie Beccaria.

Cemût assisti aes sentadis

Lis sentadis dal Consei regjonâl a son publichis. I citadins a puedin assisti aes sentadis publichis des tribunis destinadis al public, in maniere compatibile cu la disponibilitât di puescj (50), mantignint un compuartament adat, e astignintsi di cualsisei segnâl di aprovazion o disaprovazion.