I orghins

Il President al à i podês di rapresentance de Assemblee consiliâr e al indrece e al coordene lis sôs voris.

Al è l'oratôr uficiâl de Assemblee, al indrece e al modere la discussion, al da la facoltât di fevelâ, al fisse l’ordin des votazions e a ’nt comuniche il risultât.

Al lavore in colaborazion cui Presidents dai Grups consiliârs par meti adun il program e il calendari des sentadis e dal ordin des voris e par definî, là che al è previodût dal Regolament interni dal Consei, la composizion di chei altris orghins consiliârs.

Al clame adun e al e à cjâf dal Ufici di Presidence.

Al cure i rapuarts cui orghins e cu lis istituzions regjonâls, statâls e sorenazionâls e ancje i rapuarts cun chês altris assembleis legjislativis.

L'Ufici di presidence al è componût dal President dal Consei, di doi Vicepresidents e di cuatri segretaris. Lis modalitâts pe elezion dai Vicepresidents e dai segretaris a permetin la rapresentance, te stesse misure, des fuarcis politichis di minorance e di maiorance.

Aes riunions dal Ufici di Presidence al partecipe il segretari gjenerâl dal Consei cun funzion consultive.

L'Ufici di Presidence, te suaze de plene autonomie organizative, funzionâl e contabil dal Consei, al vuardie la aministrazion dal belanç interni e l’andament de gjestion, e al adote i ats aministratîfs e i regolaments previodûts dal regolament interni dal Consei regjonâl.

Cuant che al ven rinovât il Consei, l’Ufici di presidence al reste in carghe fin ae costituzion dal Ufici di presidence provisori.

I Grups consiliârs a son orghins necessaris dal Consei; dentri di siet zornadis dal insediament dal Consei, ogni Conseîr al è obleât a declarâ a cuâl grup politic che al intint aderî.

I Grups a rapresentin la proiezion des fuarcis politichis presintis intal Consei ancje se il racuardi tra la organizazion consiliâr e il sisteme dai partîts nol è automatic: e je di fat previodude une declarazion esplicite di apartignince di bande di ogni Conseîr e, tal câs che nol sucedi, il Conseîr al ven assegnât al Grup mist, adun cui Conseîrs che no rivin al numar minim domandât par formâ un Grup indipendent.

Ogni Grup consiliâr al proviôt a costituî il so Ufici di Presidence e a indicâ il President che lu rapresente.

Plui Grups consiliârs a puedin costituî une coalizion di Grups, che si da une sô denominazion.

La Conference dai Presidents dai Grups consiliârs e je clamade adun dal President dal Consei par decidi il program des voris de Assemblee o par cjapâ in esam altris cuistions di competence dal Consei.

Inte Conference a son presints ancje i Vicepresidents dal Consei. Si puedin ancje invidâ i Presidents des Comissions permanentis.

Lis Zontis consiliârs a son orghins internis destinâts ae cure di aspiets delicâts de vite dal Consei. Si costituissin a inizi legjislature e a àn a cjâf il President dal Consei regjonâl. In Consei regjonâl a son presintis la Zonte pal regolament, la Zonte des elezions e la Zonte pes nominis.

Lis Comission a son orghins internis che a davuelzin funzions di reference, consultivis, cognossitivis, di indreçament e di control, li che si articole la ativitât dal Consei. La lôr composizion e je proporzionâl, e e rispiete i rapuarts di fuarce presint intal Consei; la nomine dai Conseîrs intes Comissions si fâs daûr segnalazion dal Grup di apartignince.

Ogni Conseîr al scuen jessi membri di almancul une Comission.

La funzion principâl des Comission permanentis e je chê di contribuî ae formazion des leçs regjonâls, tal setôr di competence, cul esam preliminâr dai progjets di leç assegnâts dal President dal Consei.

Lis Comissions a son sîs:

I Comission
Belanç e programazion, credit, financis, impuestis, tribûts, contabilitât, demani e patrimoni, organizazion de Regjon, dai ents e des agjenziis regjonâls, personâl dai ents dal compart unic regjonâl, societâts a partecipazion regjonâl, statistiche e sistemis informatîfs, libri fondiari.

II Comission
Agriculture e boscs, disvilup de mont, pescje in mâr e acuiculture, industrie, artesanât, cumierç interni e forest, fieris e marcjâts, turisim e terziari, poie ae inovazion tai setôrs di produzion, tutele dai consumadôrs, professions, lavôr e cooperazion.

III Comission
Tutele de salût, servizis sociâi, alimentazion, previdence complementâr e integrative.

IV Comission
Lavôrs publics, edilizie, espropriazion, planificazion teritoriâl, viabilitât, traspuarts, puarts e aeropuarts civîi, navigazion, protezion civîl, energjie, parcs e risiervis naturâls, cjace, pescje intes aghis internis, tutele dal ambient e dal paisaç, gjavis, minieris, aghis minerâls.

V Comission
Afârs istituzionâi e statutaris, forme di guvier, elezions, dissipline dal referendum, autonomiis locâls, ûs civics, rapuarts esternis e cu la Union europeane, orghins di garanzie, bens e ativitâts culturâls, identitâts linguistichis, spetacui e manifestazions, ativitâts sportivis, coregjonâi tal forest.

VI Comission
Educazion, istruzion, formazion professionâl, universitât, ricercje sientifiche e tecnologjiche, politichis pai zovins, politichis socioeducativis, familiârs, ativitâts ricreativis e motoriis, volontariât, associazionisim, politichis de pâs, de solidarietât, de cooperazion al disvilup e de imigrazion, politichis de comunicazion.

Il Comitât al è un orghin interni permanent che al esercite ativitâts di control su la metude in vore des leçs e di valutazion des politichis regjonâls, e che al cure il rapuart anuâl su la legjislazion regjonâl e su altris ativitâts consiliârs.

Al è fat di dîs Conseîrs, nomenâts su indicazion comune dai Presidents dai Grups consiliârs, in rapresentance paritarie de maiorance e de oposizion. Ae incarghe di President si puedin elei dome i Conseîrs di oposizion.

Obietîf de ativitât di control e di valutazion al è chel di produsi cognossince su la metude in vore des leçs e sui risultâts des politichis regjonâls, a supuart des sieltis legjislativis e de elaborazion des politichis regjonâls.

La Conference je clamade adun in maniere periodiche dal President dal Consei regjonâl par fissâ lis modalitâts e i timps des voris des Comission, in coordenament cun chei de Assemblee. Ae Conference al interven il President de Regjon o un Assessôr delegât di lui.