Il Consei regjonâl al cjape dentri autoritâts regjonâls di tutele e garanzie che i citadins a puedin indreçâsi, e une biblioteche vierte al public:
Il Comitât regjonâl pes comunicazions dal Friûl - Vignesie Julie al à funzions di consulence, garanzie e vigjilance intal setôr des comunicazions. Al è un orghin de Autoritât pes garanziis intes comunicazions (Agcom) sul teritori regjonâl e al esercite ativitâts specifichis che cheste i deleghe.
Tra lis competencis principâls, il CORECOM al gjestìs lis controversiis tra utents e compagniis telefonichis, al vigjile sul setôr dai media locâi, al regule l'acès ai programs radiofonics dal Servizi public regjonâl, si interesse de tignude dal Regjistri dai Operadôrs de Comunicazion, al promôf ativitâts di studi e di ricercje ancje cu la organizazion di cunvignis sui temis de comunicazion.
La Comission regjonâl pe paritât om e femine al è un orghin consultîf dal Consei e de Zonte regjonâl e e cure il control e la metude in vore efetive intal teritori regjonâl dai principis di avualance e di paritât sociâl.
La Comission e davuelç lis sôs funzions in cjamp istituzionâl, economic, sociâl e culturâl par gjavâ i ostacui che a son cause di discriminazion direte e indirete viers lis feminis.
La Comission e je componude de Conseire o Conseîr pe atuazion dal principi di paritât di tratament pal acès al lavôr e di cutuardis Comissariis o Comissaris che a rapresentin i moviments des feminis e des associazions che si interessin de partecipazion paritarie di feminis e oms ae vite economiche e sociâl dal teritori regjonâl, e che a vedin une esperience ricognossude in chest cjamp e competence intai diviers aspiets e profîi.
A ’nt fasin part di dirit, cun vôt consultîf, lis Conseiris regjonâls in cjarie e, dopo de modificazion legjislative, un rapresentant dai Conseîrs regjonâi in cjarie.
La Regjon e calcole un impegn prioritari la tutele dai dirits des personis, massime di chês che no son in stât di difindiju in mût diret e autonom; e partecipe duncje tal garantî il rispiet, in particolâr dai fruts e dai adolessents e di chei che a son privâts de libertât personâl o che a sedin in pericul di discriminazion, in adempiment di ce che al è previodût de normative internazionâl, europeane e statâl.
Si interesse des segnalazions di câs di presumude violazion dai dirits dai fruts e dai adolessents di bande di fameis, scuelis, associazions, ents e ancje di minôrs, di segnalazions leadis a câs di presumude violazion dai dirits di bande des personis privadis de libertât personâl e di segnalazions leadis a câs di presumude discriminazion - fondade su la origjin nazionâl o etniche, su lis convinzions personâls e religjosis, su la disabilitât, la etât, l'orientament sessuâl e la identitât di gjenar – metude in at di subiets publics e privâts.
Al verifiche la metude in vore a nivel regjonâl de normative statâl e des direzions dal Parlament, cun riferiment al fenomen mafiôs e a chês altris organizazions criminâls principâls. Al colabore cul Consei regjonâl pe individuazion e difusion di liniis vuide, buinis pratichis e modalitâts par semplificâ, miorâ e mantignî limpiis lis ativitâts economichis cul obietîf di prevignî e di contrastâ il fenomen de criminalitât organizade. Al formule osservazions e parês su progjets di leç e al solecite l'intervent legjislatîf dulà che al stime che al coventi o che al sedi oportun. Al emane parês sul stampon dal Plan trienâl di prevenzion de coruzion de Zonte e dal Consei regjonâl.
Al è un orghin indipendent di garanzie che al ufrìs une forme di protezion a pro di cualsisedi subiet (singul o associât) interessât de azion de Aministrazion Publiche te nestre regjon; al è une alternative ai rimiedis rapresentâts dai ricors aministratîfs e dai ricors jurisdizionâi. Il so fin al è garantî il bon andament e la imparzialitât de azion de Aministrazion Publiche.
Il Difensôr civic regjonâl al rinfuarce e al complete il sisteme di tutele e di garanzie dal citadin denant de aministrazion publiche, e al sigure e al promôf il bon andament e la imparzialitât de azion aministrative, daûr dai principis di legalitât, trasparence, eficience, eficacitât e ecuitât.
La biblioteche dal Consei e je nassude intal 1972 par rispuindi aes dibisugnis di ricercje e documentazion de Assemblee regjonâl e e je specializade in materiis soredut juridichis economichis. Tai agns si è afermade tant che centri bibliotecari e documentâl integrât e viert al ducj i citadins pe consultazion.
La biblioteche e je vierte dal lunis al joibe, des 9.00 aes 12.30 e des 15.00 aes 16.30, e di vinars des 9.00 aes 12.30.
Jentrade: vie Giustiniano, 2 – Triest.
I citadins a puedin esercitâ il lôr podê in maniere legjitime intervignint intes politichis publichis midiant di petizions, referendums e iniziativis di leç popolâr.
La petizion e je une istance che ogni citadin talian nassût o resident in regjon al pues indreçâ al Consei regjonâl par domandâ, cun propuestis circostanziadis e diretis, proviodiments legjislatîfs o aministratîfs intes materiis di interès de Regjon e che a tocjin dibisugnis comunis, o ben par domandâ l'intervent dai orghins regjonâi intes sedis competentis pe soluzion di problemis di interès de coletivitât regjonâl.
Il referendum abrogatîf di leç regjonâl al è il strument che i citadins a puedin doprâ par pronunziâsi in maniere direte su la propueste di abrogazion di une leç regjonâl o di une disposizion di leç regjonâl.
La iniziative legjislative popolâr e previôt la presentazion di un progjet di leç regjonâl, di someti al Consei regjonâl, in maniere direte de bande dai eletôrs de Regjon.
Il Consei regjonâl, tant che orghin rapresentatîf de comunitât dal Friûl - Vignesie Julie, al calcole fondamentâl il rapuart cui zovins e, in particolâr, cul mont de scuele; par chest, intai agns al à promovût e disvilupât progjets impuartants e iniziativis che a ufrissin ai students moments di formazion sui mecanisims di partecipazion democratiche.
Propit par cheste volontât precise di promovi lis iniziativis e lis ocasions di contat cul mont dai zovins e de scuele, il Consei regjonâl al à firmât un protocol di intese cul Ufici scolastic regjonâl e cu lis cuatri Consultis provinciâls dai students.
Il protocol al à formalizât une colaborazion aromai consolidade intai agns, e al propon la cooperazion e la promozion inte realizazion di progjets, iniziativis e events cun caratar sociâl e culturâl di interès pe comunitât zovine dal nestri teritori, tant che il progjet “Students in Aule”.
Il progjet “Students in Aule” al nas cul obietîf di promovi la educazion ae partecipazion democratiche e ae citadinance ative par incressi la culture des Istituzions, dai dirits e dai dovês civics di bande dai zovins cjapâts dentri te ativitât.
“Students in Aule”, di là di fâ cognossi ai students il funzionament dal Consei regjonâl e dai struments legjislatîfs, al à tant che fin principâl chel di svicinâ i zovins aes istituzions regjonâls midiant dal coinvolziment e de scolte, par cirî di capî miôr i problemis e lis spietis di une gjenerazion dispès pôc dongje dal mont de politiche.
Il progjet al previôt in principi un percors formatîf spartît in modui di cualchi mês, che al furnìs ai fantats cjapâts dentri (plui o mancul trente di lôr) i struments didatics par elaborâ un o plui progjets di leç su tematichis che a tocjin il mont dai zovins.
Po dopo, i elaborâts a vegnin discutûts dai stes students inte Aule dal Consei regjonâl, intune vere e proprie sentade simulade, in presince des istituzions e di plui di 150 students che a vegnin des scuelis superiôrs di dute la regjon.
I students cui lôr insegnants a son i benvignûts inte sede dal Consei regjonâl dal Friûl - Vignesie Julie.
L'obietîf al è chel di svicinâ lis gjenerazions zovinis ae vite istituzionâl e politiche e di fâur cognossi il funzionament de Assemblee regjonâl.
Il Consei Regjonâl al da acet ai students inte proprie sede di Place Oberdan 6 a Triest.
I fruts des scuelis primariis e i fantats dai istitûts secondaris di prin e secont grât a puedin cognossi in cheste maniere cualis che a son e cemût che si esercitin lis funzions de Assemblee consiliâr, e cjatâsi cui Conseîrs regjonâi.
E je une oportunitât gratuite. Par organizâ une visite e covente presentade une domande semplice di bande dal dirigjent scolastic, indreçade al President dal Consei regjonâl midiant di un messaç di pueste eletroniche a gabinetto.cr@regione.fvg.it. Altris informazions a puedin jessi domandadis ai numars 040.3773106 e 040.3773237.